1984-06-15

Hernani borroka eremu bilakatu zen. Goizaldean Guardia Zibilak ETAren Adarra komandoa-ren aurkako operazioa abiatu zuen, beste kide batzuek torturatuta, zein etxebizitzatan lokalizatu jakin ostean. Juan Luis Lekuona Elorriaga Katu eta Agustín Arregi Perurena Txuria-k beren etxebizitzako gela batetik tiroka erantzun zieten eta tiroketa handi bat hasi zen. Galindoren aginduetara, Poliziak eraikina inguratu eta parean zuten etxetik ere tiro egiten zieten. Azkenik, barrura granada bat bota zieten eta kiskalita hil ziren bi ekintzaileak.

Kalean, tiroketak asaldaturik, herritarrek protestan aurre egin zieten guardia zibilei. Bi gorpuak guztiz erreta ateratzen ikustean asaldura zabaldu zen. Arregiren hilkutxa Hernaniko udaletxeko osoko bilkuran jarri zuten eta hilerrian Poliziak kargatu egin zuen.

Kortatuk Hernani 15-VI-84 abestia egin zuen gertaera hau oinarri hartuta.

• Iturria: argia