Fito Cabrales edo jaiotzez Adolfo Cabrales Mato (Bilbo, 1966ko urriaren 6a) rock abeslari eta gitarrajole bizkaitar erdalduna da. Zabala auzo bilbotarrean jaio eta hiriko giro degradatuetan nerabezaro gogorra igaro zuen, bai eta drogekiko menpekotasuna pairatu ere. Musika arloan azkenean arrakasta lortu du hala Euskal Herrian nola kanpoan ere, lehenik eta behin Platero Y Tu taldearekin eta geroago batez ere Fito & Fitipaldisekin.